雖然讀書音佮白話音的來源、發展佮演變是無仝的兩條線路。毋過，語言自古至今的演變過程中，大部分是有規律的。所以讀書音佮白話音亦一定有鋛的對應關係。
咱若「共伊」整理出來，著會凍進一步了解讀書音佮白話音發展的過程。著會凍揣(chue7)出誠濟──知影安怎讀，毋知影安怎寫──的字。整個過程，親像佇沙漠中，遇著綠洲；佇烏暗中，看著光線。滿心的歡喜，毋是外人會凍了解的。
讀書音佮白話音的對應關係，分做六種。下面先做簡單的說明，詳細的討論將佇《台語的文白異變》做深入的研究 。本文以 文 表示讀書音──「文讀音」的讀法；以 白 表示白話音──「白讀音」的讀法。
1•同聲異韻 聲母相仝，韻母無仝
「文讀音」轉「白讀音」的轉變過程中，干礁改變韻母耳耳，聲母並無改變。
文家(ka1) → 白家(ke1) 家庭(ka1 ting5) → 管家(kuan2 ke1)
文 胎(thai1) →
白胎(the1)
懷胎(huai5
thai1) → 第一胎(te7
it4 the1)
文 凍(tong3) → 白凍(tang3) 冷凍(ling2 tong3) → 凍霜(tang3 sng1)
2•異聲同韻 聲母無仝，韻母相仝
「文讀音」轉「白讀音」的轉變過程中，干礁改變聲母耳耳，韻母並無改變。
文 歲(sue3) → 白 歲(hue3) 歲月(sue3 guat8) → 年歲(ni5 hue3)
文 枝(ci1) → 白 枝(ki1) 荔枝(lai7 ci1) → 樹枝(chiu7 ki1)
文 水(sui2) → 白 水(cui2) 風水(hong1 sui2) → 雨水(hoo7 cui2)
3•異聲異韻 聲母無仝，韻母無仝
「文讀音」轉「白讀音」的轉變過程中，聲母佮韻母攏改變，聲調無改變。
文 奇(ki5) → 白 奇(khia5) 驚奇(kiann1 ki5) → 奇數(khia5 soo3)
文 芳(hong1) → 白 芳(phang1) 芬芳(hun1 hong1) → 芳味(phang1 bi7)
文 笑(siau3) → 白 笑(chio3) 見笑(kian3 siau3) → 滾笑(kun2 chio3)
4•入聲韻異變
文
(~p ~t ~k) →
白 (~h)
「文讀音」轉「白讀音」的轉變過程中，陽聲韻母的入聲韻母(~p
~t ~k)，轉為陰聲韻母的入聲韻母(~h)。
文
合(hap8)
→ 白 合(hah8)
合作(hap8 cok4)
→ 合軀(hah8 su1)
文 雪(suat4) → 白 雪(seh4) 雪冤(suat4 uan1) → 落雪(loh8 seh4)
文 隔(kik4) → 白 隔(keh4) 隔岸(kik4 an7) → 隔壁(keh4 piah4)
5•入聲韻互變
「文讀音」轉「白讀音」的轉變過程中，陽聲韻母的入聲韻母(~p ~t ~k)互相轉變，聲母佮聲調並無改變。
文 力(lik8) → 白 力(lat8) 力量(lik8 liong7) → 出力(chut4 lat8)
文 息(sik4) → 白 息(sit4) 休息(hiu1 sik4) → 消息(siau1 sit4)
文 目(bok8) → 白 目(bak4) 題目(te5 bok8) → 目鏡(bak8 kiann3)
6•無規律異變
「文讀音」轉「白讀音」的轉變過程中，聲母、韻母佮聲調攏改變，並無規律的關係。比如：
文 雨(u2) → 白 雨(hoo7) 春雨(chun1 u2) → 落雨(lo3 hoo7)
文 有(iu2) → 白 有(u7) 有益(iu2 ik4) → 有身(u7 sin1)
文 乾(kan1) → 白 乾(khian5) 乾杯(kan1 pue1) → 乾坤(khian5 khun1)
註：
(1) 聲母佮韻母無改變，干礁改變聲調耳耳，是「勾破」的關係，並毋是文白異變。比如：假(ka2)釋，假(ka3)期。
(2) 一寡台語字本身著有二個意思，是「兩意」的關係，嘛毋是文白異變。比如：校(hau7)長，校(kau3)正。
(3) 一寡台語字有二種文白異變。比如：
同聲異韻 文 下(ha7) → 白 下(he7) 下(ha7)流 → 下(he7)願
異聲異韻 文 下(ha7) → 白 下(e7) 下(ha7)流 → 下( e7)跤